NACILINGVAJ HOMOJ

Se homoj estus libroj, mi preferus ilin esperantlingvaj;
logikaj en siaj strukturoj,
facile enkadrigeblaj en klaraj klasoj.
Mi legus ilin en varma vespero, ĝue sub kokosarbo,
kuŝe sur hamako, kun marondoj kiuj murmuras proksimaj.
Kial homoj estas babeloj?
Ili konfuzas per strangaj vortordoj,
senkoheraj ortografioj kaj interpunkcioj;
signifoj ne registritaj en vortaroj,
deĉifreblaj nur por similuloj.

POEMO KIU KOMPRENAS HOMOJN

La poemo kiun mi devas verki
daŭre pendas de mia langopinto.
Mi disponas liston kun naŭcent kvardek sep vortoj,
gramatikon kun dekses reguloj
kaj du manojn pretajn uzi nacilingvan klavaron.
La poemo kiun mi devas verki
restas verkota.
Mi estas lamulo kiu portas sian cerbon enmane
kaj je ĉiu stumblo lasas la aferon fali.
La poemo ne ekzistas ĉar la homo necesa por verki
ankoraŭ ne naskiĝis en mi.
Pako de enigmaj hompretendoj rikanas
kaj la poeto pensas pri reciproka kunridado.

GRAVAJ HOMOJ

Kiom granda estas la nacio?
S-ino Maria konis la tutan kvartalon.
Ŝi estis 72-jaraĝa kiam ŝi mortis.
Kiom necesa estas la nova superbazaro
kiu inaŭguriĝis dum la lasta semajnfino?
Rikarda, kiu estas vidvino kaj loĝas sola,
aĉetis lastnokte duonkilogramon da muelita bovaĵo,
kiun ŝi preparis dum spektado de meksika dublita telenovelo.
Kiom grava estas la Kongreso en Braziljo?
La najbaro de Rikarda, s-ro Francisko,
pagis, ĉe CAIXA-loterio, 2 realojn por gajni la loton,
sed li ne gajnis.
Kiom reala estas la monsumo ĉe la Centra Banko?
Petro, alia najbaro, edziĝis kun Filomena.
Filomena ne amis Petron, sed ŝi bezonis vivrimedon.
Priscila amis Plinion,
sed Plinio amis Filomenan, kiu jam edziniĝis.
Kiom sinceraj estas la homaj ligiloj?
Antonina ĉiam iris al preĝejo.
Dio forgesis ŝin kiam kuracisto diagnozis kanceron.
Kiom bela estas la katedralo?
La bebo Tonjo naskiĝis dum moderna epoko.
Ĉu la teknologio donos kontentigajn eksplikojn al li?
Kiom saĝaj estos la konsiloj de lia smartphone?